د افغانستان څخه اروپا ته د کډوالۍ بهیر، په ځانګړي توګه د ځوانانو، په تېرو کلونو کې د پام وړ زیاتوالی موندلی دی. دا کډوال، چې ډیری یې د جګړې، ناامنۍ او اقتصادي ستونزو له امله خپل هېواد پرېښی وو، په لاره کې د قاچاقبرانو او جنایي شبکو له خطرونو سره مخ شوي. له بده مرغه، یو له ناوړه خطرونو څخه چې دا ځوانان ورسره مخ شوي، د انسانانو قاچاق او جنسي غلامي ده. دا لیکنه په اروپا او بلجیم کې د افغان ځوانانو کډوالو د جنسي غلامۍ د وضعیت په اړه یوه څېړنیزه کتنه ده چې د ځینو مطالبو سرچينې هم ورسره زیاتې شوی چې کېدای شي تاسې یې ددې ليکنې تر څنګ ولولئ.

د ملګرو ملتونو د کډوالو ادارې (UNHCR) او نورو نړیوالو سازمانونو راپورونه په مکرر ډول په اروپا کې د کډوالو او پناه غوښتونکو تر منځ د انسانانو د قاچاق او جنسي استحصال د زیاتوالي په اړه اندېښنه ښودلې ده. افغان ځوانان، په ځانګړي توګه هغه څوک چې بې اسنادو او بې سرپرسته (Unaccompanied Minors) اروپا ته رسېږي، د دې شبکو لپاره اسانه هدف ګرځي.

د څېړنو او د رسنیو د راپورونو پر بنسټ:

• زیانمنتیا: ډېری افغان ځوانان له اقتصادي پلوه کمزوري، له خپلو کورنیو څخه جلا او د سیمه ییزو ژبو او قوانینو څخه ناخبره وي، چې دا عوامل دوی د استحصال لپاره ډېر زیانمن کوي [1].
• د قاچاقبرانو رول: قاچاقبران ډیری وخت د دې ځوانانو څخه د خپلو پورونو د پرې کولو یا د سفر د اسانتیا په بدل کې په زور یا فریب جنسي کار اخلي. په ځینو مواردو کې، ځوانان په زور جنسي تجارت ته اړ ایستل کېږي [2].
• ځایونه: دا ناوړه عملونه په اروپا کې په بېلابېلو هېوادونو کې واقع شوي، چې بلجیم هم پکې شامل دی. د بلجیم لوی ښارونه لکه بروکسل او انتورپن، چې د کډوالو او بې کوره خلکو ډېر تراکم لري، د دې جنایي شبکو لپاره د پټنځایونو په توګه کارول کېږي [3].

بلجیم یو له هغه اروپایي هېوادونو څخه دی چې په کې د افغان ځوانانو شمېر په کې په دې وروستیو کلونو کې د پام وړ زیات شوی دی. د بلجیم د پولیسو او ټولنیزو خدماتو په وینا، د افغان کډوالو ماشومانو (UMCs) په ډله کې د انسانانو د قاچاق پېښې هم ډېرې لیدل شوي دي. کومې پښېې چې د اړوندو ارګانونو لخوا ثبت شوي بلخصوص د افغانانو په برخه کې نه دي خپرې شوي. خو په جرمني کې ځینې افغان ځوانان د پیسو د ترلاسه کولو لپاره مجبور شوي چې د لوړ عمر لخوا د جنسي غلام په ډول ونيول شي. په دې پېښو کې ځینې یې د یو ځل او ځینې یې د دایمي اړیکو لپاره کارول کېږي [4]. په دې ډله کې ځینې داسې ځوانان هم شته چې له زړو ښځو سره ملګري شوي او دا ښځې دوی د جنسي غلام په ډول کاروي او دوی ته پیسې ورکوي تر څو یې دوی خپلو کورنیو ته واستوي.

د جنسي غلامۍ ډولونه

1. پورونه او جبري کار: ځینې ځوانان مجبور دي چې د قاچاقبرانو پورونه په جنسي خدمتونو یا نورو ناوړه کارونو پرې کړي [5].
2. فریب او ګواښ: جنایي شبکې ځوانان په داسې ډول غولوي چې دوی ته به کار یا ځای ورکړي، خو وروسته یې د ګواښ او تشدد په واسطه مجبوروي چې په فحشا کې برخه واخلي.
3. بې سرپرسته ماشومان: دغه ماشومان چې د دولت له ملاتړ څخه پټ یا تښتېدلي وي، په اسانۍ سره د قاچاقبرانو ښکار ګرځي [6].
4. د کورنۍ لخوا فشار: بلجيم او اروپا ته راغلي افغان ځوانان د کورنیو لخوا مجبورېږي چې دوی ته د نورو بهرمیشتو په شان پیسې واستوي. دوی هم مجبوریږي چې ددې غوښتنې د پوره کولو لپاره فحشا ته مخه کړي. 

د حل او مبارزې لارې چارې

د دې جدي ستونزې سره د مبارزې لپاره، لاندې اقدامات اړين ښکاري:

• د ملاتړ پروګرامونه پیاوړي کول: د بلجیم حکومت او اروپایي ټولنه باید د بې سرپرسته کډوالو ماشومانو د ملاتړ او پاملرنې پروګرامونه پیاوړي کړي او د دوی د ورکېدو مخه ونیسي. د کوربه توب خوندي ځایونه او رواني ملاتړ ډېر اړین دي [7].
• د پوهاوي لوړول: باید د کډوالو په کمپونو او د پناه غوښتنې په مرکزونو کې د انسانانو قاچاق د خطرونو په اړه پوهاوی لوړ شي.
• د قانون پلي کول: د پولیسو او قضایي ارګانونو ترمنځ همغږي باید زیاته شي ترڅو د انسانانو د قاچاق نړیوالې شبکې له منځه یوړل شي. د بلجیم د فډرال پولیسو د انسانانو قاچاق برخې (Trafficking in Human Beings Unit) باید په دې برخه کې لا زیاتې سرچینې ولري.
• د قربانیانو خوندیتوب: هغه افغان ځوانان چې د جنسي غلامۍ قرباني شوي دي، باید د قانوني مرستې، روغتیایي پاملرنې او خوندي پناه ځایونو ته لاسرسی ولري، پرته له دې چې د کډوالۍ وضعیت یې په نظر کې ونیول شي [8].
• د افغان ټولنوې رول: په بلجيم او اروپا کې افغان ټولنې هم باید په دې برخه کې د افغان ټولنې د ثبات، افغان ننګ او نښان د ساتلو لپاره باید لاس په کار شي او نویو راغلیو ځونانو ته بېلابېلې ناستې او پروګرمونه جوړ کړي.

په اروپا او بلجیم کې د افغان ځوانو کډوالو جنسي غلامي یوه پټه، خو سخته او دردناکه بشري فاجعه ده چې عاجل او نړیوال اقدام ته اړتیا لري. دا ستونزه یوازې د حكومتي ادارو کار نه دی، بلکې دلته د ټولو اروپا مېشتو افغانانو مسولیت هم دی چې د مسلکي او منطقي چلند، د څېړنو په رڼا کې د دې ځوانانو ژوند وژغوري او دوی ته یو خوندي راتلونکی برابر کړي. ددې لپاره اړينه ده چې موږ خپلې وړې او سترې ټولنې په خپل ملاتړ سره غښتلې کړو او ددې ستر خطر پر وړاندې په ګډه مبازه وکړو.

(References)

• [1] UNHCR. (2022). Protection challenges for Afghan refugees and asylum seekers in Europe. 
• [2] Council of Europe. (2021). Report on preventing and combating trafficking in human beings for the purpose of sexual exploitation.
• [3] Myria – Federal Centre for the Migration of Belgium. (2023). Trafficking in human beings in Belgium: Annual report.
• [4] Guardian – “A step away from hell: the young male refugees selling sex to survive” (2020)
• [5] Laczko, F., & S. E. L. V. A. G. G. I. (2015). Trafficking in persons and smuggling of migrants to Europe. IOM Publications.
• [6] European Union Agency for Fundamental Rights (FRA). (2020). Child trafficking in the EU.
• [7] Save the Children. (2019). Lost in Transit: Unaccompanied children on the move in Europe.
• [8] Belgian Law on Trafficking in Human Beings (2005).