ژباړه: حمیدالله حمیدي
نوې څېړنې ثابتوي چې تور انګور د ستړیا او خپګان په له منځه وړو کې مرسته کوي. د هغې مطالعې په پایله کې چې د جنوبي کارولینای په پوهنتون کې ترسره شوې ده، په ډاګه کوي چې په تورو انګورو کې شته رسوراترول (resveratrol) چې د التهاب ضد خاصیت لري، د هغو التهاباتو مخه نیسي چې انسان ورسره د خپګان او ستړیا په حالت کې مخ کېږي او د لا زیاتېدو لامل یې ګرځي.
«سوزان کي وود» چې د دې څېړنې مشري یې پر غاړه وه، وایي د نننۍ ټولنې لپاره دغه څېړنه ډېره اړینه او ګټوره ده؛ ځکه نن سبا ډېری خلک پر ژور خپګان او هغو ناروغیو اخته دي کومې چې د ژور خپګان له امله ورته پېښې شوې دي.
نوموړې وایي، موږ هیله من یو چې زموږ دغه څېړنه به له هغو کسانو سره پوره مرسته وکړي چې په دې برخه کې کار کوي او یا هڅه کوي چې دې ډول ناروغیو ته د حل یوه مناسبه لار ولټوي.
د دې ډلې یو بل غړي «جولي فینل» وایي په تورو انګورو کې شته رسوراترول کولای شي د انسان په ټول بدن کې د التهاب مخه ونیسي.
څېړنې دا هم په ګوته کړې چې تور انګور پر دې سربېره یو ډول ماده چې په درملو کې هم ترې ګټه اخیستل کېږي، په خپل ترکیب کې لري. دغه ماده کولای شي چې د وینې د عروقو د له منځه وړو مخه ونیسي او دغه راز په وینه کې د LDL کلسټرول راټیټ کړي.