ليکنه: محمود سعيد
سيدحبيب وقار په ۱۳۶۰ لېږديز لمريز كال د وردګو ولايت د چك ولسوالۍ د امانكي په كلي كې زېږېدلى.
نوموړی په درې كلنۍ كې د خپل پلار له نعمت څخه بې برخې شو او پاته ژوند يې له مور، څلورو وروڼو او دوو خويندو سره؛ د خپلې مور او مشر ورور په زيار او هڅو له ډېرو ستونزو او كړاوونو سره تېر كړ.
خپلې لومړنۍ او منځنۍ زدكړې يې د چك ولسوالۍ په حضرت عمر فاروق لېسه كې په ۱۳۷۹ لمريز كال كې بشپړې كړې او وروسته يې په ۱۳۸۳ لمريز کال د كابل پوهنتون د ژورنالېزم له پوهنځي څخه د لېسانس سند واخيست.د ليسې په يوولسم ټولګي کې په زده کړو بوخت و چې د معيوبينو په اړه يې لومړۍ ليکنه د معيوبينو په مجله کې په ۱۳۷۸ لمريز کال خپره شوه. مجله په ليسه کې ووېشل شوه او د ليکنې له امله ډېر وستايل شو. همدا يې د ليکنو پيل شو.
د پوهنتون د زده كړو په مهال په كابل كې د دوو کلونو لپاره د ډيوې مجلې خبريال پاتې شوى دى. له پوهنتون څخه تر فراغت وروسته د اداري اصلاحاتو او ملكي خدمتونو په كميسيون كې د يو كال لپاره د رتبو او معاشونو په اداره كې په کار بوخت شو. ورپسې يې د نېشهيي توكو له وزارت سره د نېشهيي توکو د له منځه وړلو په دفتر کې د دوو كلونو لپاره د عامه پوهاوي د مسول په توګه دنده ترسره كړې ده. په ۱۳۸۶ لمريز كال كې يې له ارادې ورځپاڼې سره د اېډېټور په توګه دنده پيل كړه چې ورسره يو ځاى يې د باختر له اونيزې سره هم په همدې برخه كې كار كاوه. د يو کال له پاره د خبريال www.khabarial.com وېبپاڼې همکار و چې له کابل څخه به يې ليکنې په ليکه کولې. په اراده ورځپاڼه او باختر اوونیزه کې له دوه کلونو کار وروسته د ۱۳۸۸ لمريز كال په جوزا كې باختر آژانس ته لاړ، چې په باختر آژانس كې د خبريال او په سرنوشت ورځپاڼه کې د ليكوال په توګه د يو كال لپاره پاتې شو.
هر کار او هره دنده يوه بېله تجربه شمېرل کېږي. ښاغلي وقار د يوې نوې تجربې او نوي کار له پاره په كابل كې د بي بي سي راډيو په تعليمي څانګه، د چاپي مطبوعاتو په برخه کې د پښتو برخې د مسوول او اېډېټر په توګه د پنځو کلونو له پاره کار وکړ. د بي بي سي د تعليمي خپرونو د کار تر څنګ د الفتح اونيزې مسول مدير هم و چې په کابل کې خپرېده.
ښاغلی وقار اوس په کابل کې د بېړنيو مرستو او پراختيا په موسسه کې د ۲۰۱۵ م کال د پارلماني ټاکنو د ځانګړې وېبپاڼې www.elections.af د اېډېټور په توګه کار کوي او تر څنګ يې د لومړيتوبwww.lomritob.com وېبپاڼې همکار دی.
په ۱۳۹۳ لمريز کال د کابل ادبي بنډار له خوا د همدې کال د (غوره ليکوال) مډال ورکړل شو.
تر اوسه يې لاندې ژباړل شوي کتابونه چاپ شوي:
- بلوغ او د هويت ستونزه:
(اروا پوهنه) كتاب چې په ۱۳۸۵ لمريز كال كې د دانش خپروندويې ټولنې له خوا د چاپ په ګاڼه سمبال شوى دى.
- وروستۍ پاڼه:
د امريكايي ليكوالو لنډې کيسې چې په ۱۳۸۸ لمريز کال کې د ختيزې سيمې د ليکوالو د ټولنې له خوا چاپ شوی.
- زه ملاله يم:
د ملالې يوسفزۍ د ژوند کيسه، د پاکستان پېښې او جګړې، په ۱۳۹۳ لمريز کال د اکسوس کتاب پلورنځي له خوا چاپ شو.
- په سلګونو مقالې او راپورونه په برېښنايي پاڼو او همدارنګه په چاپي خپرونو كې خپاره شوي دي.
چاپ ته تيارې ليكنې او ژباړې:
- پرمختللې عکاسي، ژباړه
- ټولنيزې رسنۍ، ژباړه
- څپېړه، ياددښتونه او کيسې، ليکنه
- څنګه ژباړه وکړو، ليکنه
هغه د خپل ژوند د يادښتونو او خاطرو په اړه وايي:
((په ژوند كې داسې ډېرې ښې خاطرې چې د يادولو وړ وي نه لرم، خو بيا هم ويلاى شم چې له پوهنتون څخه فراغت او د ۱۳۹۳ لمريز کال د غوره ليکوال مډال راکول زما د ژوند ښې خاطرې بلل کېږي.
زما د ژوند تر ټولو بده خاطره چې زه يې ډېر دردولى يم زما د مور مړينه وه چې د ۱۳۸۸ لمريز كال د تلې په ديارلسمه يې له دې نړۍ څخه د تل لپاره سترګې پټې كړې. پيداكوونكى او پناه كوونكى لوى څښتن دى، خو زه ځكه د خپلې مور په مړينه ډېر دردېدلى يم چې ما د خپل پلار مينه او محبت نه دى ليدلى ماته مې مور د مور او پلار دواړو مينه راكړې وه.))
هغه د خپل اوسني شخصي ژوند په اړه وايي:
په ۱۳۸۴ لمريز كال كې مې په خپل ولايت كې واده وكړ چې اوس د څلورو اولادونو اېمل، ملالۍ، صفيې او الیاس پلار يم. تر دې وړاندې له خپلې كورنۍ سره په وردګو كې اوسېدم خو د ۱۳۸۷ لمريز کال د لېندۍ له مياشتې وروسته د دندې او بوختياوو له امله كابل ته راغلم چې تر اوسه کابل کې اوسېږم.
