حمیدالله د محمد بشیر زوی د بادشا خان لمسی په ۱۳۶۵ کال کې د وردګو ولایت د چک ولسوالۍ د عربانو درې په بیدرویو کلي کې زږېدلی دی، لومړی یې دیني زدکړې کړې دي، تر ډيره یې لومړنۍ زدکړې د کلي له ځايي ملا کړې؛ بیا په دیني زدکړو پسې له کوره وتلی او درې کاله یې دیني مدرسې ویلې دي، په ۱۳۸۲ کال کې چې کلي په افغانستان کې د حامد کرزي په مشری انتقالي اداره جوړه شوه ښاغلي حمیدي عصري زدکړو ته مخه کړه د سیمې په مشهور ښوونځي (دعربانو په عالي لیسه) کې یې زدکړې پيل کړې، دا چې مخکې یې دینې زدکړې کړې وې نو عصري زدکړې یې له شپږم ټولګي پيل کړې دي، په ۱۳۸۷ کال کې له همدې لیسې په اعلی درجه فارغ شو، د کانکور ازموینه یې ورکړه په پایله کې د بلخ پوهنتون د ادبیاتو پوهنځي ته بریالی شو خو د یولړ ستونزو له امله یې یاد پوهنځي و نه لوست.
په ۱۳۸۸ کال کې یې په کابل کې د افغانستان تخنیکي او مسلکي زدکړو انستیتیوت ته امتحان ورکړ(ATVI (Afghanistan Technical Vocational Institute له بریا وروسته یې همدلته د کمپیوټر ساینس دېپارتمنت په بریالۍ توګه ولوست، همدا چې له دغې دوه کلنې دورې فارغ شو په ۲۰۱۱ کال کې یې له سپوږمۍ رادیو سره دنده پیل کړه.
حمیدي له ادبیاتو سره مینه لرله، له سپوږمۍ رادیو سره له کار وروسته یې دا مینه لا ډيره شوه، د ملګرو په هڅونه یې یو ځل بیا د کانکور ازموینه ورکړه، او د شپې پوهنتون ادبیاتو پوهنځي ته بریالی شو، دمګړی د ښوونې او روزنې پوهنتون د ژبو او ادبیاتو پوهنځي په پښتو څانګه کې زدکړې کوي، څلورم کال یې دی.
حمیدي همدارنګه په سرنوشت او همیانۍ ورځپاڼه د خبریال او ډیزاینر دنده هم ترسره کوي، د سپوږمۍ تر څنګ د چین له نړیوالې رادیو سره هم له څلورو کالو راهیسې همکاري لري.
حميدي له ځينو ویبپاڼو سره قلمي همکاري لري، د رسمي کارونو تر څنګ په بېلو برخو کې ژپاړې هم کوي.