ژباړه: محمود سعید

1. د خاوند يا مېرمنې پر وړاندې د ژوند د ورځنيو ښکېلتياوو او ناخوالو په اړه په خواشينې او څېره خبرې مه کوئ.

2. ډالۍ ورکول مينه زياتوي؛ د بېلابېلو مناسبتونو پر مهال خپل خاوند/مېرمنې ته ډالۍ که څه هم ډېره وړه وي؛ په موسکه څېره وړاندې کړئ.

3. که په کور کې کومه نيمګړتيا وينئ؛ په خوښۍ او مينه يې يادونه وکړئ.

4. د خپل خاوند/مېرمنې په وړاندې د بل نارينه/ښځينه ستاينه مه کوئ.

5. د خپل خاوند/مېرمنې پلو خپلوانو ته درناوی وکړئ او کله ناکله يې له هغوی مخکې دعوت کړئ.

6. هېڅ کله خپل خاوند/مېرمنه د هغوی له نېکو خپلو سره له تګ راتګه مه منع کوئ.

7. له خپلو سره د خپل خاوند/مېرمنې پر وړاندې په غوږ کې خبرې مه کوئ.

8. هېڅ کله خپله مېرمن/خاوند د هغوی د خپلو پر وړاندې مه تحقيروئ. توهين او نه درناوی د ګډ‌ ژوند ګرانښت کموي.

9. هېڅکله خپل ځان له مېرمنې/خاوند څخه لوړ مه معرفي کوئ. هڅه وکړئ؛ په ګډ ژوند کې د زه او ته پر ځای د (موږ) ویی وکاروئ.

10. هر کله مو چې خاوند/مېرمن غوسه وي؛ په مينه او مهربانۍ يې آرام کړئ.

11. مېلمستيا او تفرېح ته له خپلې مېرمنې/خاوند او بچيانو سره يو ځای ولاړ شئ.

12. د خپلې کورنۍ ټولنيز، فرهنګي او اقتصادي امتيازونه له خپلې مېرمنې/ خاوند له کورنۍ سره مه پرتله کوئ؟

13. د خپل خاوند/مېرمنې هر څومره واړه کارونه هم وستايئ. د مېرمنو لپاره ستاينه له دې کبله چې مهربانه روح لري؛ مهمه او په ګډ ژوند کې د بريا کيلي ده.

14. د مېرمنې پر وړاندې په بېلابېلو کړنو کې زور ښوودنه مه کوئ.

15. هغه زیار يا لګښت چې د خپلې مېرمنې يا خاوند د خپلو په هرکلي او مېلمستيا کې يې لګوئ؛ هېڅ کله په خوله مه راوړئ.

16. خپله مېرمن په کور کې مه بندي کوئ. هغه له خوښيو مه محروموئ.

17. خپلې خنداوې او خوښۍ په کارځای کې مه پرېږدئ. مه هېروئ چې مېرمن/خاوند مو هم په کور کې خندا او خوښۍ ته اړتيا لري. 18. د کور په کارونو کې مرسته مه هېروئ. په دې وپوهېږئ چې د باندې د کار په شان د کور کارونه هم ستړيا لري. مېرمنې هم د کور په کارونو کې ستړې کيږي او د مرستې او قدردانۍ وړ دي.