لیکنه: ظریفه غفاري

لکه څنګه چې ټولو ته معلومه ده نو د یو هیواد ثبات او ټیکاو په هره برخه کې د هغه هیواد د امنیتي او بیا استخباراتي حالاتو یا امکاناتو پورې مستقیم تړون لري نو، هر یو هیواد د دې هڅه کوي چې تل په هرڅه سمبال، مناسب او منظم امنیتي او استخباراتي سیستم ولري ترڅو د خپل او پردي نه د هر ډول رسیدونکي خطر مخه ونیول شي.
تیرو ورځو کې ښاغلي حامد کرزي هم ویلي ؤ چې
“دا تړون به د ډیورنډ او ګندمک تړونونو ته ورته تړون به وي او یوځل بیا د تل لپاره به افغانان ورسره ځوریږي.”
محترم امر الله صالح د افغانستان د ملي امنیت د ریاست پخواني مشر هم ویلي چې
“دا تړون د افغانستان د استخباراتو خرڅلاو لپاره زمینه جوړول دي”
ښاغلي رحمت الله نبیل د ملي امنیت ریس هم د دې تړون سره خپل کلک مخالفت اعلان کړی او تړون د ریاست د معاون لخوا لاسلیک شوی.
دغه تړون په هکله بیلابیلې نظریې او نیوکې موجودې دي خو، دا واضح ده چې د افغانستان د ملي امنیت ریس رحمت الله نبیل دریځ پدې اړه واقعأ د ملاتړ وړ دی او هیله ده ښاغلي ولسمشر او بیا د افغانستان د ولس د کور نمایندګان هم پدې اړه صداقت سره فیصله وکړي او د دې اجازه دې ورنکړي چې د پاکستان د آی اس آی اداره کوم چې تل زمونږ د لستوڼي مار پشان پاتې شوی یوځل بیا زمونږ خاورې سره لوبې وکړي.
ځکه چې: افغانستان کې تېرو څو لسیزې جګړې هرڅه تباه او برباد کړي ؤ، استخباراتي ریاستونه، امنیتي سرچینې، دفاعي سیستم او بیا اقتصادي، ټولنیز، فرهنګي او نورې ټولې برخې د خارجي مداخلو او داخلي سرغړونو له کبله نامنظم او ډیرې ژوبل شوې وې. په ۲۰۰۱ کال کې د نوي حکومت د راتګ سره سم افغانستان وروسته له ۳۰ کلونو بیا د یوه څه هلو ځلو سره  منظمې  استخباراتي او امنیتي سرچینې یې جوړ کړي چې د ګاونډیانو بلخصوص د پاکستان د آی اس آی ادارې د سترګو اغزي ګرځیدلي. پاکستان هغه هیواد دی چې که تیر ته ځیر شو نو هیڅ یوه برخه د تاریخ به داسې ونه مومو چې دا هیواد زمونږ د هیواد ملاتړ یا دوست پاتې شوي وي او نه هم ترې دا  تمه لرلاي شو چې دا هیواد به مونږ سره د دوستۍ او د ترهګري سره د مبارزې لپاره لاس یو کړي، بلخصوص د آی اس آی ادارې څخه دا تمه لرل زما په نظر حماقت او ځان غولونه ده. پاکستان هغه هیواد دی چې د افغانستان او افغانانو په سر یې القاعدې، طالیانو او نور تروریستي ډلو سره معاملې کولې او کوي. څه موده مخکې مې یو خبر کې ولوستل چې د پاکستان د آی اس آی ادارې پخواني مشر لندن کې یوې ټلویزیوني ناسته کې ویلي ؤ چې
“مونږ طالبانو سره د افغانستان په سر معاملې کولې.”
د القاعدې مشر اسامه بن لادن د پاکستان ایبت آباد کې وموندل شو سره د دې چې دا هیواد له القاعدې سره د مرستې ادعاوې ردولې، کویټ ته د مذاکرې لپاره د طالبانو لوړپورې چارواکي له پاکستان څخه تګ راتګ کوې، د طالبانو ویاندویان او مشران د پاکستان له آدرسه تل نړۍ او افغانستان سره مخ کیږي….او داسې نور
نو، له دې نه واضح معلومیږي چې دا اداره هیڅکله زمونږ په ښه نشي کیدلاي او اوس هم د دې کوښښ کوي چې زمونږ څو کلنې لاسته راوړنې رانه واخلي لکه څنګه چې کلونه پخوا د څو داخلي داړه مارانو او وطن فروشانو په مرسته یې د ډاکتر نجیب الله د وخت استخبارات له پښو وغورځول.  دا ځل هم په همدې کوښښ روان دي خو هیله ده نور مشران له خوب څخه پاڅیدلي اوسي او د داسې ناسزاؤ مخه ونیسي.

د یو آزاد او سرلوړې افغانستان په لور