د (رَیان دروازه) د هغو رمضاني لیکنو یوه سلسله ده چې ۳۰ برخې لري او د هېواد لیکوال او شاعر ګل آغا احمدي وردګ د اړوندو احکامو او مسایلو سره یو ځای د موثرو درسونو په شکل برابره کړې ده. د همدې سلسلې څخه به د رمضان د میاشتې په هره ورځ د هغه یوه برخه د لومړیتوب د برېښناپاڼې له لیارې خپرېږي او د مینه والو تنده به پرې ماتېږي. باید وویل شي چې په دې سلسله کې د روژې په شرعي احکامو سربېره، په افغاني ټولنه کې د رمضان د میاشتې ځینو ځانګړو دودونو ته هم لنډه اشاره شوې او د  همدې سپېڅلې میاشتې د هرې لحظې اهمیت یې په ګوته کړی دی. د لومړیتوب برېښناپاڼې له ټولو درنو لوستونکو او مینه والو څخه په درنښت هیله کوي چې دغه سلسله تر پایه له موږ سره په خپلو لوستلو ښکلې او د رمضان د میاشتې په هکله مو د معلوماتو برخه پياوړې کړی. باید وویل شي چې (رَیان) د جنت د هغې دروازې نوم دی چې یوازې مومنان روژتیان به پرې جنت ته ننوزي. خدای پاک (ج) مو عبادتونه او روژې په خپل دربار کې قبولې کړي. آمین