ژباړه:حمیدالله حمیدي
ژوند زما او ستا له خیال او فکر سره سم نه دی تنظیم شوی؛ نو ښه ده چې له بېځایه شرط اېښودو او په خالي لاس له نورو سره د ځان برابرولو خوبونه پرېږدی او له همدغه محدود ژوند سره جوړجاړی وکړی.
له نورو سره د ځان برابرولو ناروغي او ضد مو ژوند لا په کړاو کې کوي، نو ښه ده چې د انعطاف مننې له دود سره ځان عیار کړی؛ خبرې نرمې کړئ او په ژوند کې بریاوو، پرمختګونو، ستونزو او کړاوونو ته ښه راغلاست ووایئ.
که تل فکر کوی چې ټولې پېښې به مو په تاوان وي، نو په لوی لاس به مو د ځان لپاره ستونزې جوړې کړې وي. پر تاسو چې کومې پېښې راتلونکې هم دي، ښايي په ګټه مو وي. ستونزو ته ښه راغلاست ووایاست، له بېځایه ګیلو او مانو ځان وژغورئ، کله چې له ستونزو سره مخ کېږی او په پوره بریا ترې ځان وباسی، دا ستاسو لپاره په ژوند کې لویه بریا ده. له هرې رامنځته کېدونکې پېښې مننه وکړئ او پر وړاندې یې د سپر په توګه ودرېږئ.
که له کومې پېښې سره مخ کېږئ، نو دغه جمله تکراروئ: «کېدای شي دا مې په خیر وي.» ټولې پېښې د خدای پاک په اراده رامنځته کېږي، په هره پېښه کې د خدای پاک حکمت نغښتی دی، نو دومره جدي یې مه نیسئ؛ ځکه انسان هغه موجود دی چې د هر ډول ستونزو د زغملو وړتیا لري.
