پېژندنه
ژور نالېست، ژباړن او لیکوال سيدحبيب وقار په ۱۳۶۰ لېږديز لمريز كال د وردګو ولايت د چك ولسوالۍ د امانكي په كلي كې زېږېدلى.
نوموړی په درې كلنۍ كې د خپل پلار له نعمت څخه بې برخې شو او پاته ژوند يې له مور، څلورو وروڼو او دوو خويندو سره؛ د خپلې مور او مشر ورور په زيار او هڅو له ډېرو ستونزو او كړاوونو سره تېر كړ.
زده کړې
سید حبیب وقار لومړنۍ او منځنۍ زده كړې د مېدان وردګ ولایت د چك ولسوالۍ په حضرت عمر فاروق لېسه كې په ۱۳۷۹ لمريز كال كې بشپړې كړې او وروسته په ۱۳۷۳ لمريز کال د كابل پوهنتون د ژورنالېزم له پوهنځي د لېسانس سند واخيست.
شخصي ژوند
په ۱۳۸۴ لمريز كال كې یې په خپل ولايت كې واده وكړ چې اوس د څلورو اولادونو اېمل، ملالۍ، صفيې او الیاس پلار دی. تر دې وړاندې له خپلې كورنۍ سره په وردګو كې اوسېده خو د ۱۳۸۷ لمريز کال د لېندۍ له مياشتې وروسته د دندې او بوختياوو له امله كابل ته راغلی چې تر اوسه کابل کې اوسېږي.
دندې
د پوهنتون د زده كړو په مهال په كابل كې د دوو کلونو لپاره د ډيوې مجلې دخبریالۍ دنده ترسره کړه. له پوهنتون څخه تر فراغت وروسته د اداري اصلاحاتو او ملكي خدمتونو په كميسيون كې د يو كال لپاره د رتبو او معاشونو په اداره كې کار وکړ، بیا يې د نېشه يي توكو له وزارت سره د نېشه يي توکو د له منځه وړلو په دفتر کې د دوو كلونو لپاره د عامه پوهاوي د مسول په توګه دنده ترسره كړه. په ۱۳۸۶ لمريز كال كې يې له ارادې ورځپاڼې سره د اېډېټور په توګه دنده پيل كړه چې ورسره يو ځاى يې د باختر له اونيزې سره هم په همدې برخه كې كار كاوه. د يو کال له پاره د خبريال وېبپاڼې همکار و چې له کابل څخه به يې ليکنې په ليکه کولې. په اراده ورځپاڼه او باختر اوونیزه کې له دوه کلونو کار وروسته د ۱۳۸۸ لمريز كال په جوزا كې باختر آژانس ته لاړ، چې په باختر آژانس كې د خبريال او په سرنوشت ورځپاڼه کې د ليكوال په توګه د يو كال لپاره پاتې شو.
ښاغلي وقار د بي بي سي راډيو په تعليمي څانګه، د چاپي مطبوعاتو په برخه کې د پښتو برخې د مسوول او اېډېټر په توګه د پنځو کلونو له پاره کار وکړ. د بي بي سي د تعليمي خپرونو د کار تر څنګ د الفتح اونيزې مسول مدير هم و چې په کابل کې خپرېده.
ښاغلی وقار اوس په کابل کې د بېړنيو مرستو او پراختيا په موسسه کې د ۲۰۱۵ م کال د پارلماني ټاکنو د ځانګړې وېبپاڼې د اېډېټور په توګه کار کوي او تر څنګ يې د لومړيتوبwww.lomritob.com وېبپاڼې همکار دی.
اثار
د ليسې په يوولسم ټولګي کې په زده کړو بوخت و چې د معيوبينو په اړه يې لومړۍ ليکنه د معيوبينو په مجله کې په ۱۳۷۸ لمريز کال خپره شوه. مجله په ليسه کې ووېشل شوه او د ليکنې له امله ډېر وستايل شو. همدا يې د ليکنو پيل شو.چې له هغه وروسته یې ادبي او علمي اثار ژباړلي او خپاره کړي دي
- بلوغ او د هويت ستونزه ( ژباړه):
(اروا پوهنه) كتاب چې په ۱۳۸۵ لمريز كال كې د دانش خپروندويې ټولنې له خوا د چاپ په ګاڼه سمبال شوى دى.
- وروستۍ پاڼه ( ژباړه):
د امريكايي ليكوالو لنډې کيسې چې په ۱۳۸۸ لمريز کال کې د ختيزې سيمې د ليکوالو د ټولنې له خوا چاپ شوی.
- زه ملاله يم( ژباړه):
د ملالې يوسفزۍ د ژوند کيسه، د پاکستان پېښې او جګړې، په ۱۳۹۳ لمريز کال د اکسوس کتاب پلورنځي له خوا چاپ شو.
- په سلګونو مقالې او راپورونه په برېښنايي پاڼو او همدارنګه په چاپي خپرونو كې خپاره شوي دي.
چاپ ته تيارې ليكنې او ژباړې:
- پرمختللې عکاسي، ژباړه
- ټولنيزې رسنۍ، ژباړه
- څپېړه، ياددښتونه او کيسې، ليکنه
- څنګه ژباړه وکړو، ليکنه
لاسته راوړنې
په ۱۳۹۳ لمريز کال د کابل ادبي بنډار له خوا د همدې کال د (غوره ليکوال) مډال ورکړل شو.