پيژندنه

ښاغلی عبدالنافع همت د حاجي عبدالکريم خان زوی د (١٣۴۷) لمريزلیږدیز کال د ليندۍ د مياشتي پر څوارلسمه نېټه د کندهار ولايت، ارغنداب ولسوالۍ د ناګان په کلي کې زېږېدلی دی.

 

زده کړې
ښاغلي عبدالنافع همت  تر دوولسم ټولګي پورې  په کندهار کې زده کړې  کړي دي،  اوس د کابل د تعليم او تربيې پوهنتون، ادبياتو پوهنځي د څلورم کال  محصل دی.

 

دندې
ښاغلي  عبدالنافع همت په څو نادولتي ټولنو کې پر کار سربېره يې په بېلابېلو ښوونځيو کې د ښوونکي په توګه هم کار کړی دی.
له (٢٠٠٠) ميلادي کال راهيسې د بي بي سي راډيو په تعليمي پروژو کې د ليکوال او پروډيوسر، ډرامې ليکوال، ايډېټر او خبريال په توګه کار کړی چې اوس په بي بي سي راډيو پورې تړلې ادارې (افغانستان تعليمي موسسه) کې د ايډيټوريل ټرېننګ کورډينېټر په توګه کار کوي.

شخصي ژوند

عبدالنافع همت واده کړی دی ، درې زامن او دوې لوڼې لري.

 

فرهنګي هڅې

ښاغلي عبدالنافع همت  په (١٣٧٨) لمريز کال يې په کوټه کې د ميوند کلتوري ټولنې بنسټ کښېښود او په (١٣٨١) لمريز کال يې د ( ميوند) په نوم د يوې کلتوري او ټولنيزې مجلې خپرول پيل کړه او څلور کاله يې وچلوله.

ښاغلي همت  شعرونه، لنډې کيسې، طنزونه، ډرامې او بېلابېلو سياسي، اجتماعي او فرهنګي موضوعاتو باندې مقالې ليکلي  خو تر ډېره بريده د طنزي ليکوال په نوم شهرت لري.

خپاره شوي اثار:
۱:  سپي څنګه مډالونه وګټل؟ طنزي مجموعه
۲: سياسي عينکې، طنزي مجموعه
۳: د جهاني جهان، د عبدالباري جهاني په باب د مقالوټولګه.
۴: خپل وطنه، ګل وطنه  ( د متلونو کیسې).

ناچاپ اثار:
۱:  اتڼ په پارلمان کې ( طنزي ډرامه )
۲:  ملا چرګک  طنزي تعريفات

۳: د کندهار مېله ځايونه ( رساله)

۴: خبري ببري.  طنزي کالم چې په خدمتګار ورځپاڼه او تاند ويبپاڼه کې خپور شوی دی.
۵: د طنز ليکلو هنر
۶: متفرق طنزونه چې په بېلابيلو ويبپاڼو کې راغلي، خولا نوم نه دی ورته غوره شوی.