محب الله آرمل

درنو لوستونکو زه محب الله آرمل يم ، پلار جان مې محمد هاشم او نيکه مې محمد ظريف نوميږي، زه په کال ۱۳۷۰ لمريز کې د وردګو ولايت، جلګې ولسوالۍ د چنګې په کلي کې دنيا ته راغلی يم، ښوونځی مې په خپله ولسوالي کې لوستی، زموږ ښوونځی يا لېسه د جلګې فعاله لېسه وه چې د غازي عبدالکبير په نوم ياديږي، په ۱۳۸۷ کال له همدې لېسې فارغ شوم او د کانکور تر ازموينې وروسته پکتيا پوهنتون د ښوونې او روزنې پوهنځي ته بريالی شوم، په ښوونځي کې مې درسونه نه ويل او چندان مزه مې نه وه خو له پوهنتون په کال ۱۳۹۱ کې له پښتو ادبياتو دويم نمبر فارغ شوم او سمدلاسه د ميدان وردګو د ملي راډيو تلويزيون د نشراتو مسئوليت را په غاړه شو، دوه درې کاله همدلته وم بيا د پکتيکا د ملي راډيو تلويزيون آمريت ته کامياب شوم، تر اوسه په همدې دندې کې بوخت يم، دامې رسمي دندې وې، غير رسمي دندې مې زياتې کړې او هسې مو سر نه پرې خوږوم.
بل مې داسې کومه خاصه توره نه ده کړې خو ! ليکنې کوم، شاعري کوم، مطالعه کوم، راډيو ته خپرونې جوړوم او ژباړې کوم چې بيا يې يا کمپيوټر را سره ساتم او يا يې سايټونو، مجلو او نورو چاپي خپرونو ته لېږم.
تاسې د خير يوسئ چې راسره لولئ يې، تر اوسه مې کوم کتاب نه دی چاپ شوی، خو کېدای شي دې ورځو کې چاپ شي. ټول نهه ۹ نا چاپ آثار لرم که موقع برابره شوه چاپ به يې کړم، بس همدومره .