لیکنه : ډاکټر نارمن ونسنټ پيلي
ژباړه: اسدالله خان امرخېل
دريمه برخه
زه به تاسې ته دیوه ځوان کيسه وکړم، دا ځوان د ګولف لوبې د توپ څارنې لپاره په دنده ګمارل شوی و، هغه ځوان يوه ورځ زړه نا زړه له مانه وپوښتل چې ډاکټر نارمن غواړم چې تاسې سره خبرې وکړم. ما ورته وویل چې لوبه پای ته ورسیږي له هغه روسته به خبرې وکړو، د لوبې پای ته له رسېدو روسته له هغه ځوان سره د يوې ونې سيوري لاندې کیناستم، ورته مې وویل: ښه اوس وايه څه دې ویل؟ ځوان راته په ځواب کې وویل هغه څه چې مې ویل غوښتل اوس رانه هېر شول، نو اوس غواړم چې لاړ شم.
ورته مې وویل: چېرته غواړې لاړ شې؟
ځوان وویل ماته هم نه ده مالعومه چې چېرته لاړ شم، زه غواړم له دې ځای نه ډېر لرې لاړ شم. ما له ځوان نه وپوښتل چې آيا کوم پلان لرې چېرته چې تلل غواړې؟ هغه ځوان زما پوښتنو پرېشانه کړ او وې ويل چې هر چېرته چې لاړم ځم
ما له ځوان نه وپوښتل چې هغه کوم کار دی چې تاسې يې په ښه ډول تر سره کولی شئ؟ هغه وويل چې په دې اړه زه هېڅ نه پوهېږم. ما هغه ته وويل کوم کار دې خوښيږي؟ هغه وويل چې زه په دې هم نه پوهېږم.
نو ما ورته وویل چې ته غواړې چېرته لرې لاړ شې خو په دې نه پوهېږې چې چېرته لاړ شې، ته په دې هم نه پوهېږې چې کوم کار په ښه ډول ترسره کولی شې او په دې هم نه پوهېږې چې کوم کار سره دې مینه ده. ما ځوان ته وویل چې زما خبرې سمې دي کنا؟ ځوان په ناهيلۍ سره ځواب راکړ، هو زما په اړه ستاسې خبرې بيخي سمې دي زه همداسې یم، هغه زیاته کړه: آيا زه يو ناکام شخص یم؟ ما ورته وویل هېڅ کله هم نه ته يو ډېر ښکلی څېره لرونکی ځوان يې او زه ډاډمن یم چې ته به په ژوند کې ضرور بریالی شې ځکه په تا کې يو ښه مثبت فکر لرونکي شخص (ځواک) موجود دی.
هغه ځوان ته مې وویل چې په دوه اونيو پورې د خپل راتلونکي ژوند په اړه فکر وکړه، له دې نه روسته تاسې څه چې غواړئ جوړ شئ هغه وليکه او هغه ليکل شوي څو ټکو يا پر الفاظو عمل وکړه، بيا مې ورته وویل چې دغه ټولې خبرې په يو کارټ وليکه او ماته يې راوړه.
دوه اونۍ روسته چې هغه ماته راغی نو هغه بيخي بدل شوی انسان و، له څېرې نه ښکارېده لکه په تن کې يې چې نوې روح پيدا شوې وي، هغه په يو کارټ کې ليکلي و چې غواړي د يوې فابريکې عمومي مديرپه توګه دنده تر سره کړي، د هغې فابريکې عمومي مدير پنځه کله روسته تقاوت کيږي او زه غواړم د هغه ځای ونيسم، ځوان وويل چې اوس هغه په دغه فابريکې کې د کارکونکي په توګه دنده ترلاسه کړې ده.
بیا پنځه کاله روسته هغه ځوان خپل هدف تر لاسه کړ د هغې فابريکې عمومي مدير شو، اوس هغه خوشاله دی او پر نفس اعتماد لري.
کله تاسې خپل ځان ته کومه موخه ټاکئ او بيا مثبت فکر او پوره اعتماد او له يقین سره د خپلې موخې په لور ګام پورته کوئ نو بیا په تاسې کې هغه ځواک او وړتيا خپله پيدا کيږي، چې له امله یې هغه ټول کړاونه له منځه وړي چې ستاسې د موخې خنډ ګرځي.
کله چې تاسې لومړۍ موخې ته رسېږئ نو دويمه موخه وټاکئ،په ياد مو وي چې له لومړي هدف تر لاسه کولو روسته ستاسې په ذات کې يو ډول مثبت بلونونه او پوخ اعتماد را منځته کيږي، چې د هغه په مرسته تاسې بلې موخې ته په ډېره اسانۍ رسېږئ.
زه به تاسې ته خپله يوه پېښه بیان کړم، د کاناډا په يوه ښار کې مې يوې غونډې ته وینا کوله، د دې غونډې مشري يو داسې شخص په غاړه وه چې پر نفس یې اعتماد ډېروه او دښه شخصیت څښتن و. هغه ډېر په زړه پورې خبرې کولې، زه د هغه له شخصیت نه ډېر متاثر شوم اړ يې کړم ترې وپوښتم چې تاسې څنګه وکولی شول په پوره اعتماد سره داسې فکر ولرئ؟
هغه وویل چې دا ډېره لویه کيسه ده خو زه به تاسې ته په لنډو ټکوکې ووایم، په هغه وخت کې زه يو ناکام ترین شخص وم، زما مېرمنې پرلپسې په کوښښ کې وه چې په ما کې اعتماد پيدا کړي تر څو مو ژوند ښه شي. د همدې هدف لپاره يوه ورځ زما مېرمنې ماته يو کتاب راوړ او ټنګار يې وکړ چې دا باید ولولم او د هغه کتاب نوم د ښه فکر ګټورې پایلې (چې دا کتاب هم مالیکلی دی).
هغه زياته کړه چې دغه کتاب ماته د يوې نوې نړۍ لار راوښودله، له دې کتاب نه ډېر متاثر شوم او په دې کتاب کې ډېر په زړه پورې نظریات مې مطالعه کړل او عمل پرې وکړ.
ما په مغزو کې دا خبره ثبت کړه چې د نړۍ هېڅ ځواک ماته شکست نه شي راکولی او بیا حالات زما پر اعتماد، يقين او جذبې پر وړاندې سر کوځي شول په خپله مخه لاړل او د ژوند په چارو کې مې لوی پرمختګونه وکړل.
د بریا لاسته راوړلو لپاره څلور شيان ډېر اړين دي.
۱- خپل هدف مو ښکاره وټاکئ.
۲- د هدف تر لاسه کولو لپاره لومړی خپل فکر ته مثبت بدلون ورکړئ.
۳- حالات په ډېر ژور نظر نه تېر کړئ.
۴- په خپل ځان کې د ایمان او يقین پيدا کړئ چې تاسې خپل هدف ته به ضرور رسېږئ.
دا هغه څلور خبرې دي، چې په مرسته يې تاسې کولی شئ هره ماته په بریا بدله کړئ.
دا خبره په ياد و لرئ، چې هدف ته رسېدل په دې معنا نه ده، چې د بل پښې ووهئ بلکې حقيقي بریا په دې معنا ده، چې خپله بريا کې باید د نورو ګټې هم په نظر کې ونيول شي، تاسې پرمختګ هتمن وکړئ خو د نورو خلکو د لارې خنډ مه ګرځئ. د لوی څښتن تعالی فرمان دی چې تاسې پرمختګ وکړئ خو دورغ، رشوت، بی ایمانی او همداسې نورې کړنې مه ترسره کوئ ځکه د دغو کارونو تر سرکولو سره کومه بریا مو چې ترلاسه کړې ده دا د یو څو ورځو لپاره وي حقیقی بریا هغه ده چې په خپل دم سره یې تر لاسه کړې چې به کې چاته زیان نه وي اوښتی.
