ليکنه بشير
په بلجيم کې هم ډېر محصلين د زدکړو لپاره له خپل کلي او ښار څخه بل ښار ته سفر کوي او هلته په ليلیه یا ځان ته په بېله شوې کوټه کې اوسېږي چې دې کوټې ته په هالنډي ژبه کې kot وايي.
په بلجيم کې د CEBUD دفتر په دې اړه یو راپور خپور کړئ چې وړاندې له وړاندې یوه محصل ته د کلني لګښت په اړه معلومات ورکوي، ښودل کېږي چې سږ کال یو محصل کم تر کمه 15346 ایرو کلنۍ لګښت لري. دا لګښت تېر کال 14103 ایرو وو.
یو محصل باید کم تر کمه د یوې کوټې لپاره سږ کال 392 ایرو کرایه په پام کې ولري چې په کلنۍ ډول دا کرایه 420 ایرو د تېر کال په پرتله ډېره شوې.
کوت یا kot په هالنډي ژبه کې هغه وړوکې کوټې ته ویل کېږي چې یو محصل په هغه کوټه کې ویده کېږي او هلته له پوهنتون وروسته خپل درس وايي.
له نورو هېوادونو څخه د هغه محصلينو دا لګښت چې په سکالرشيپ راغلي وي، حکومت یا پوهنتون په غاړه اخلي. خو هغه محصلين چې په خپل شخصي لګښت راځي بیا دا مصارف باید په خپله غاړه واخلي.
تاسې هم په بلجيم کې د زدکړو لپاره په دې کچه لګښت ورکولو ته تیار یاست؟
