ژباړه: احمدشاه پاڅون
جاپاني ساینسپوهانو د بریښنا د وایرلیس لېږد کامیابه تجربه تر سره کړه او پردې انقلابي ټکنالوژۍ یې کار پیل کړی، چي ښايي نړۍ کي د بریښنا د کمښت ستونزه د تل لپاره له منځه یوسي. د جاپان معتبري ساینسي ادارې ( جاپان ایرو سپیس ایکسپلوریشن ) د مائیکرو ویوز په مرسته د بریښنا انرژي له ۱ – ۸ کیلو متره لیري لیږدولو سره ستره کامیابي تر لاسه کړه. دا بریښنا پرته له لین څخه له یوې سیمي بل ځای ته و لېږدول سوه. ساینسپوهان وايي: ددې ټکنالوژۍ ګټه داده چي په مرسته یې خلا کي موجوده بې ناپایه لمریزه انژي مځکي ته را لیږدولای سي، چي ورسره به پر مځکه د بریښنا د کمښت ستونزه بیخي حل سي. ددې کار د بشپړیدو لپاره به له مځکي شاوخوا ۳۶ زره کیلو مټره واټن باندي په فضا کي لمریز وسایل او انتنونه لیږدول کیږي، څو لمریزه انرژي مځکي ته را انتقال کړي. اوس مهال دا انرژي په بنسټیز حالت کي ده، تمه ده چي تر ۲۰۴۰ کال پوري به ددې خبري عملي بڼه په سترګو و ګورو.
